Biti lulik, manfatin, bua malus,

Ilas keek nebe naran Timor
Inur nebe ema bolu Timor
Asuain nebe ema bolu Timor
Fununain nebe ema bolu Timor

Hodi loron, no tinan funu soru funu maluk
Hodi mate no terus tane rai lulik Timor
Hodi ran no ruin habokon no sukat rai doben Timor
Hodi naran Timor, funu to raihun mutin

Fulan Maiyu 2006 la ses husi hau nia kakutak
Fulan Maiyu nebe loron halo sai makas
Fulan Maiyu nebe oan timor ohofali malu
Fulan nebe halo ema matawen turuk-turuk

Hau bolu baa hau aman inan, halai buka fatin
Hau bolu baa belun, buka fatin subar dala idatan
Hau halerik ba Railulik Timor husu atu labele ami oho malu
Hau harohan ba matebian, labele fo kastigu mai ami
Hau reja ba Aman maromak tan sa mak husik ami aho malu

Ilas keek nebe hanaran Timor
Ilas nebe oan Timor lakohi rona malu
Ilas nebe halo ema buka riku no dukur atu hader
Ilas nebe sai fatin ba ema ran a’at atu sokar lia

Ilas kieek Rai Lulik Timor
Ba to bain hira, mak oan Timor bele dulur malu?
Ba to bain hira mak oan Timor tur mutuk iha biti lulik?
Ba to bainhira mak oan Timor mama mutuk manfatin ida?
Ba to bainhira mak oan Timor hakoak malu no simu malu?

Maromak, Biti lulik, manfatin, bua malus,
railulik, uma lulik, foho lulik, no liurai rai nian
fatuklulik, matebian, kablake ramelau
ami husu perdua karik ami haluha imi
Ami husu perdua karik ami nugka temi imi nia naran
Ami husu perdua karik ami nungka rekonyese imi
Ami husu perdua…perdua…perdua……..

Cristo
Dili, 9/6/06