Dadolin nebe sulin buka fatin naklekar, Dadolin naklekar tu ba mai, naklekar tuir nia klalaok sai dalas ba dalas, to butuk iha we fatin, haberan no halolos los nakleuk sira, to kore fukun sira nebe metin, liu husi dadolin no bua malus. Bua malus iha koba nodi look ba bainaka sira nune haliban mutuk iha dadolin nebe ami hakerek.

Tuesday, April 10, 2007

Badinas ou Baruk

Servisu ou lalika
Badinas ou baruk
Hakarak ou lakohi
To fulan hotu osan nafatin deit
Serbisu barak, ou serbisu liu oras
Osan nafatin deit

Uummmm...sidonio tansa mak tegki badinas?
O serbisu tinan barak
Hau foin tama serbisu
O halo barak
Hau halo labarak

Ummm,, fulan to simu osan hanesan nafatin

Ehhh tansa tegki badinas?
Baruk?
Problema saida?

10/4/07
Cristo

ELeisaun

ELeisaun

Tempu elesaun
Tempu fan aimorok
Koalia barak-barak
Rejultadu letra zero

Tempu eleisaun
Symbol partidu, bandeira, fotografia,
Leu-leu, rebo-rebo, talin-talin

Tempu eleisaun
Wow .. koalia rebo-rebo
hanesan kuda talin rebo-rebo
Promete rebo-rebo
Klalaok kleuk rebo ba mai

Hi belun asuwain Timor oan
Tempu too ona ita hakilar
Hodi dadolin no tebe hateten
“lae,,lae...lae..Para ho buat bosok!

Unidadi mak ita nia bitiboot
Ita rain ita ukun
Halokon esplorasaun agora kedas


Dili, 10/4/07
Cristo

Monday, April 9, 2007

Fahe ita domin

Hau nia lalatak
Mak onia mehi
waihira ita hasorumalu
o hare hau hanesan te’e

hau la sente o nia domin
o nia domin hanesan beneno

o nia lalatak iha hau nia mehi
hau tauk, hau hakfodak, hau hakilar

wainhira o besik hau
hanesan aitarak sona borus hau fuan
hanesan loro sunumotuk hau kakorok

hases hau a’n tamba o hakribi hau
hases koko haluha o nia oin
hases hakerek aiknanoin
aiknanoik sulin hanesan mota
sulin tun hodi fahe ita domin


9/4/07
Crito

Saturday, April 7, 2007

Haklaken ba Tinan moris nian

Loron 3 fulan Abril fila hikas
hanoin ba memori loron moris
akontesementu ba ema neb mak senti iha loron ne’e

Loron 3 fulan Abril
Loron barak no fulan barak iha inan nia kanotak
hanesan loron, fulan, tinan, lao ho oras

Loron 3 fulan Abril
ne’e mak loron memoria ba Tereza
loron kosok aon mai iha mundu

ne’e mak misteiru ida nebe nugka lakon
iha tempu lakontenti...
iha tempu dulur ho familia ..
iha tempu hasoru malu ...
no mos iha tempu nebe atu hein domin ...

Loron 3 fulan Abril iha simbol prefeitu dura tinan-tinan
iha tempu fo’o..
iha tempu simu ...
iha tempu ispera ...

Mai ita hananu
happy birthday to you 2xhappy birthday 2x happy birthday to you...
2April 2007;
By: Cristo

(Aiknanoik n'e didika ba Atai (Tereza Alves) nebe halo nia tinan iha lorn 3 Abril 07 ba 26)

Knanoik sona borus hau sorin

Wow Belun ita knanoik sona borus hau sorin.
Knanoik nebe sulin hanesan mota oan,
tula sorumalu sai mota inan
nebe sulin boot to sai tasi.

Hau atu buka lian terik nebe atu sata terik mota oan
hau atu buka knanoik terik atu taterik netik bee inan
maibe hau atan koko tau terik hetan fukun oin oin
nebe teri dalan
so hau belun ho hau mak bele terik fukun hirak ne;e
so hau belun no hau bele kore fukun oan sira no halolo halo loos.
so atan hau ho belun mak bele halolo.
setan mak bele kore fukun ne'e halolon tuir hau ho hau belun?

Cristo 8/9/06

UKUN Rasik A’an II

75….99 ababu metan taka falun TL
75….99 oan Timor halerik lun turu
75….99 funu maluk funu soru
75….99 hakilar bolu, asu halerik

loro matan sae soru
sae soru aviau liras naruk
moluk loron habelar a’as
habelar soru oan Timor sela kuda
loron matan monu kraik
monu soru oan Timor monu naklekar

fulan leno rai nakukun
leno dalan oan Timor buka dalan
fitun naroman kibi-kibi
kibi-kibi naroman ba kalan

Berliku haksimuk tada raihun mutin
Haksimuk teni naroman atu mosu
molok naroman atu nakmosu
oan timor loke matan manu kokorek

Manu aman kokorek, tada ba raihusar no rai ulun
nakukun nakle'es, fila ba naroman
Naroman tada sela kuda
selarasik kuda uman, oan timor kaer rasik kuda talin
sela sala sela kuda, kuidadu ema seluk maka sae.

Febreiru 2006
Cristo

Saida mak Ukun A’an?

wainhira besikroat hakroat nia tutun
nebe ubriga atu luta ba justisa
saida mak ukun a’an?

hakilar no luta ba rai no povu
nebe hametin ho unidade, laos hafahe
Saida mak ukun a’an?

ukun a'an
lori terus no mate mak sosa
hodi ran mak hakerek
hakerek ba ema no rai idane’e
istoria luta ba ukun rasik a’an
nebe falun hela iha istoria rai ida ne’e

agora ukun rasik a’an
O hakilar lian murak
hakilar tuba ba rai nebe mak o luta
o lahatena saida mak ukun rasik a’an
karik ema mak kili o?

agora se mak ukun a’an?
ukun a’an mak nebe?
ou ema seluk mak ukun o?

21/8/06
Cristo